Love Leabhair Gaeilge do daoine fásta an Nollaig seo

Printer-friendly version

Conaire MórTá leabhair Ghaeilge den scoth le fáil i leabharlanna áirithe Bhaile Átha Cliath an nollaig seo i gcomhar le Love Leabhair Gaeilge.

Seo rogha de leabhair Ghaeilge le daoine fásta a fháil ar iasacht (agus le daoine óga freisin!):

Conaire Mór le Diarmuid Johnson (Leabhar Breac)
Is athinsint bhríomhar bheoga atá in Conaire Mór ar an eipic Sean-Ghaeilge Togail Bruidne Da Derga — scéal a thosaíonn le rí á ghairmeadh de Chonaire agus a chríochnaíonn lena mharú brúidiúil ar bhruach na Dothra. Na hiontaisí ar fad atá i dtraidisiún na seanscéalta, tá siad ar fáil go flúirseach in imeachtaí an scéil, idir mhacghníomhartha Chonaire agus a theacht i réim, na blianta a raibh Éirinn faoi bhláth lena linn, agus an tuar báis nárbh fhéidir a shéanadh. Seo scéal nár insíodh i nGaeilge le beagnach míle bliain, ach tá Conaire Mór i réim anois arís ar deireadh. Is é an file Diarmuid Johnson a rinne an t-athscríobh ar an mbuntéacs.

Kíor Thuathail Kíor Thuathail le Jean-Claude Izzo. Bernadette Nic an tSaoir a rinne an leagan Gaeilge. (Leabhar Breac)
Scéinséir crua fileata suite ar bhruach na Meánmhara. Seo é scéal triúr comrádaithe a d'fhás suas in éindí ar shráideanna grianlasta Mharseille — Ugo, Manu agus Fabio — agus Lole álainn ghiofógach. Dlúthchairde iad le linn a n-óige. Scarann an saol ó chéile iad, agus tugann an bás ar ais iad.
Cur síos álainn fileata é seo ar Mharseille — ó chúl- sráideanna an Phanier go dtí an Canabière agus anuas go dtí an seanchalafort — agus ar na Francaigh, na hIodálaigh, na Spáinnigh agus na hArabaigh arbh iad pobal na cathrach sin iad.

Nollaig Ó Gadhra: Cuimhní Cairde le Máirín Ní Ghadhra (Cló Iar-Chonnacht)

Duan na Nollag Duan na Nollag le Charles Dickens. Pádraig Ua Duinnín a rinne an leagan Gaeilge (Leabhar Breac)
Ceann de na scéalta Nollag is cáiliúla a scríobhadh riamh. Úrscéal gearr le Charles Dickens is ea Duan na Nollag (A Christmas Carol), a foilsíodh in 1843. Eagrán nua Gaeilge é seo bunaithe ar aistriúchán an fhoclóirí, an tAthair Pádraig Ua Duinnín, agus é athchóirithe do léitheoirí ár linne ag Maitiú Ó Coimín. Is iad seanléaráidí Arthur Rackham atá mar mhaisiúchán ar an leabhar.
San úrsceal gearr clúiteach seo, insítear scéal Eibinéasair Scrúg, seanchnuastóir crua a dtagann taibhse a sheanchomhghleacaí gnó Iacób Meárlaí ar cuairt chuige, agus taibhsí ón Nollaig a bhí, atá, agus a bheidh. Tar éis a gcuairte, déantar duine níos cineálta agus níos séimhe de Scrúg.

i gCochall mo Chroí I gCochall Mo Chroí le Bríd Ní Mhóráin (Leabhair Comhar)
Níl aon amhras ach gur teist é téama an chnuasaigh seo, téama an cheana, ar an luí aigne is mó atá ag Bríd Ní Mhóráin. Is iomaí saghas éagsúil ceana a fheictear sna dánta seo – cion réigiúin, don dúiche, don dúlra, an ghean lena maíonn sí tábhacht na seandaoine. Tá flaithiúlacht agus tuiscint le braith sa chaoi go ndéanann sí ionramháil ar an réimse leathan ábhar a bhíonn faoi chaibidil aici; is fíorannamh go bhfeictear cáineadh ina saothar. San am céanna, ní dánta rómhothalacha iad seo; léirítear leibhéal intleachtúil iontu, agus tuigtear don léitheoir go bhfuil an file ag smaoineamh a bealach tríd na dánta.

 

Mise Áine Mise Áine: An Bhean Istigh le Áine Durkin  (Cló Iar-Chonnacht)
Is é seo an chéad chnuasach filíochta agus amhrán atá curtha i gcló ag an údar, Áine Durkin, scríbhneoir a bhíonn ag blagáil faoin ainm Mise Áine. Bhuaigh Áine Durkin an chéad duais leis an saothar seo i gComórtas na Scríbhneoirí Úra i gComórtais Liteartha Oireachtas na Gaeilge 2017.
Tá an leabhar seo déanta suas as cuimhní cinn agus smaointe Áine in imeacht na mblianta. Díríonn sí ar eachtraí pearsanta, chomh maith leis an saol i gcoitinne. Tá nádúr an duine agus an dúlra á gcíoradh aici agus, anois is arís, feictear iad fite fuaite le chéile sa mbailiúchán seo.

 

Oilithreach Pinn le Liam Ó Muirthile (Cois Life)
Shiúil Liam Ó Muirthile an Camino Francés as a chéile ó Saint-Jean-Pied-de-Port go Santiago de Compostela i bhfómhar na bliana 2015. Leis féin a bhí sé agus a phaca ar a dhroim, ag fanacht sna tithe aíochta oilithreachta ar a thuras 770 km.
Breacann sé an tírdhreach dúinn agus tráchtann sé ar na daoine a casadh air. Oilithreacht pinn agus fionnachtain phearsanta í seo ina roinneann sé linn a chuid smaointe féin ar an dtír a bhfuil dlúthcheangal sinseartha ag Éirinn léi agus a ndúirt an mórfhile Spáinneach Juan Ramón Jiménez ina taobh:
‘Trí chéile, is tír í an Spáinn atá fréamhaithe go domhain sa réadúlacht, tír bhréag-reiligiúnda í, tír Chaitliceach seachas Chríostaí, eaglasta seachas spioradálta, tír phréamhacha agus chos seachas sciatháin … ar an gcúis sin is dánta misteacha iad na liricí Spáinneacha is fearr: tugann siad faoin spéir, faoin eitilt.’ Coimeádann an t-údar a dhá chos ar an dtalamh, ach ó am go ham eitlíonn sé ar an gcuma Spáinneach.

Idir dhá thir Idir dhá thír le Alex Hijmans (Cois Life)
Cnuasach gearrscéalta nua ó pheann Alex Hijmans.
‘Fágann an duine lorg ina dhiaidh mar a fhágann bád ar an bhfarraige, nó réalta eireabaill sa spéir. D’fhág Tír na Sámach a lorg ormsa, agus – dá laghad é – d’fhág mise lorg ar Thír na Sámach.’
I scéalta an chnuasaigh seo, leanann peann Alex Hijmans an lorg a d’fhág an imirce ar charachtair éagsúla – i Londain, i Liospóin, i nGaillimh, i mBéal Feirste, in Washington D.C. agus in áiteanna eile nach iad.

 

Love Leabhar Gaeilge is a national campaign sponsored by Foras na Gaeilge, run by MeasMedia, and featuring all of the leading Irish language book publishers. Look out for Love Leabhar Gaeilge stands in libraries.

Foras na Gaeilge

Add new comment

Feedback