An Cháin ar Thalamh Chriosaithe Chónaithe – Léarscáil Deiridh do 2025

Tugadh isteach an Cháin ar Thalamh Chriosaithe Chónaithe leis an Acht Airgeadais, 2021. Is cáin bhliantúil í an cháin a ríomhtar ag ráta 3% de luach margaidh na talún. Is é príomhchuspóir na cánach gníomhachtú tráthúil na talún forbraíochta cónaithe criosaithe agus seirbhísithe le haghaidh na tithíochta a spreagadh.

Shainaithin Comhairle Cathrach Bhaile Átha Cliath talamh a thagann faoi raon feidhme na cánach trí dhréachtléarscáil athbhreithnithe a fhoilsiú i mí Feabhra, 2024. Tá próiseas mapála bliantúla 2025 tugtha i gcrích anois agus an léarscáil deiridh foilsithe an 31 Eanáir 2025.

Is é an 1 Feabhra 2025 an chéad dáta dliteanais le haghaidh na cánach. Is iad na Coimisinéirí Ioncaim a thugann faoi riar na Cánach ar Thalamh Chriosaithe Chónaithe.

Le haghaidh tuilleadh eolais faoi CTCC, léigh ‘Réamheolas ar Cháin ar Thalamh Chriosaithe Chónaithe’ agus ‘Cáin ar Thalamh Chriosaithe Chónaithe – Do Cheisteanna Freagartha’

Aighneachtaí maidir le hIarraidh ar Athchriosú ar an Léarscáil Deiridh do 2025

I gcás ina sainaithnítear talamh ar an léarscáil deiridh do 2025, a foilsíodh an 31 Eanáir 2025, a bheith faoi réir na cánach ar thalamh chriosaithe chónaithe, féadfaidh duine ón 1 Feabhra 2025 go dtí an 1 Aibreán 2025, i ndáil leis an talamh thuasluaite ar leis an duine sin í, aighneacht a chur faoi bhráid Chomhairle Cathrach Bhaile Átha Cliath ina n-iarrtar athrú ar chriosú na talún sin.

Féadfar aighneacht a chur faoi bhráid Chomhairle Cathrach Bhaile Átha Cliath mar a leanas:

Féadfar aighneacht i scríbhinn a dhéanamh go leictreonach tríd an suíomh gréasáin ag engage.dublincity.ie/en-IE/projects/residential-zoned-land-tax-rezoning-request-submission-form-on-the-final-map-for-2025

Nó

Féadfar aighneacht a dhéanamh i scríbhinn chuig “Léarscáil CTCC”, Aonad Bainistíochta Talún Gníomhaí, Roinn Pleanála agus Forbartha Réadmhaoine, Bloc 4, Urlár 2, Oifigí na Cathrach, Cé an Adhmaid, Baile Átha Cliath 8, D08 RF3F.

Déan d’aighneacht trí mheán amháin le do thoil, is é sin, trí chóip chrua nó trí thairseach an tsuímh ghréasáin.

Ba cheart go mbeadh san áireamh le haon aighneacht den sórt sin fianaise úinéireachta, cúiseanna mionsonraithe leis an iarraidh ar athchriosú, lena bhféadfaí leanúint de ghníomhaíocht eacnamaíoch leanúnach a bheith san áireamh, mar aon le léarscáil ar scála 1:1,000 lena léirítear go soiléir an cheapach ábhartha thalún.

Foilseofar aon iarraidh ar athchriosú i scríbhinn den sórt sin a fhaightear faoin 1 Aibreán 2025, seachas na codanna sin den aighneacht atá ina sonraí pearsanta, ar an suíomh gréasáin atá faoi chúram Chomhairle Cathrach Bhaile Átha Cliath le linn na tréimhse reachtúla ábhartha. Eiseoidh Comhairle Cathrach Bhaile Átha Cliath litir admhála d’iarraidh ar athchriosú ina mbeidh mionsonraí na staire pleanála is déanaí den talamh faoin 30 Aibreán don úinéir talún. Féadfar an litir admhála sin a úsáid chun tacú le héileamh ar dhíolúine ón gcáin a éireoidh i ndáil leis an talamh is ábhar don iarraidh do 2025. Ní mór an t-éileamh a dhéanamh i dtuairisceán cánach bliantúil ar thalamh chriosaithe chónaithe 2025, nach mór a dhéanamh leis na Coimisinéirí Ioncaim faoi nó roimh an 23 Bealtaine, 2025. Féach www.revenue.ie chun mionsonraí a fháil

Déanfaidh Comhairle Cathrach Bhaile Átha Cliath gach iarraidh ar athchriosú a bhreithniú ag féachaint do phleanáil chuí agus forbairt inbhuanaithe an cheantair.