Sábháilteacht ó Dhóiteán ar Scoil

Na Trí Riail Órga

1. Caith súil timpeall do scoile agus faigh réidh leis na guaiseacha.
2. Suiteáil córas braite agus aláraim dóiteáin chun rabhadh luath a thabhairt.
3. Ullmhaigh plean aslonnaithe agus déan cleachtadh rialta.

Gnáthamh Sábháilteachta ó Dhóiteán i Scoileanna

Ba cheart gnáthamh rialta a dhéanamh d’aird a thabhairt ar na réamhchúraimí dóiteáin seo a leanas i ngach scoil:

• A chinntiú go bhfuil na bealaí éalaithe go léir ón scoil saor ó bhacainní agus gur féidir iad a rochtain ag gach tráth. Níor cheart doirse ar bhealaí éalaithe a chur faoi ghlas choíche nuair a bhíonn duine ar bith san fhoirgneamh. Ba cheart go mbeifí in ann doirse amach a oscailt gan stró agus láithreach ón taobh istigh.
• Ba cheart doirse dóiteáin a choimeád dúnta ag gach tráth. Ní féidir ach le gléas leictreamaighnéadach coinneála ar oscailt atá ceangailte leis an gcóras braite agus aláraim dóiteáin na doirse sin a choimeád ar oscailt.
• Córas cigireachtaí rialta ar threalamh comhraicthe dóiteáin garchabhrach a chur i bhfeidhm, ar nós múchtóirí dóiteáin agus spóil phíobáin.
• Na córais braite agus aláraim dóiteáin agus an soilsiú éigeandála a thástáil go rialta, agus cuntas a choimeád ar na torthaí cigireachta agus aon ghníomhartha a rinneadh sa chlár sábháilteachta ó dhóiteán.
• A chinntiú go bhfuil na fógraí treorach dóiteáin inléite agus infheicthe.
• A chinntiú go dtugtar faoi dhruileanna tréimhsiúla aslonnaithe dóiteáin.
• Oiliúint a chur ar na baill foirne go léir chun trealamh comhraicthe dóiteáin garchabhrach a úsáid agus a chinntiú go mbíonn siad ullamh chun dul i mbun gnímh i gcás dóiteáin.
• Gan stóráil ábhar indóite i gclóis staighre a cheadú, faoi staighrí nó feadh bealaí éalaithe, ar nós pasáistí.
• Déan an réamhchúram leordhóthanach nuair a bhíonn úsáid á baint agat as páipéar nó ábhair thanaí eile ar mhaithe le maisiúcháin, agus ná húsáid olann chadáis don chuspóir sin choíche. Ná croch maisiúcháin mar sin ó fheistithe solais ná i ngar d’fhearais.
• Bí an-chúramach nuair a bhíonn drámaí scoile á léiriú agus ag cóisirí scoile ionas nach mbeidh aon dóchúlacht ann go rachadh feistis nó prapaí trí thine.

Seiceálacha Iarscoile

Déan cigireacht i ndiaidh uaireanta scoile leis an méid seo a leanas a chinntiú:

• Tá gach gléas téimh, feistithe gáis agus gléasanna eile a tháirgeann teas múchta, agus fágadh sábháilte iad.
• Níl aon ábhar indóite d’aon sórt i ngar d’fhoinse fhéideartha adhainte.
• Tá gach ceimiceán i saotharlanna a d’fhéadfadh a bheith baolach stóráilte go sábháilte.
• Tá gach ábhar glantacháin, amhail ceirteacha olúla, ceirteacha snasta, cinn mhapa, stóráilte i gceart i seomra stórais oiriúnach a bhfuil an doras dúnta air.
• Níl bruscar agus dramhaíl indóite carntha i saotharlanna, ceardlanna, seomraí ceardaíochta, seomraí coire nó áiteanna eile sa scoil.

Druileanna Dóiteáin do Scoileanna

Tá an fhreagracht ar phríomhoide na scoile agus ar an mbord bainistíochta a chinntiú go ndéantar druileanna aslonnaithe dóiteáin go rialta. Ba chóir druileanna aslonnaithe dóiteáin a dhéanamh uair amháin ar a laghad in aghaidh an téarma scoile.

Caithfidh gach gnáthamh dóiteáin a bheith bunaithe ar nós imeachta simplí éifeachtúil, a beartaíodh go sonrach don áitreabh scoile inar gá dó feidhmiú.

Caithfear breithniú grinn a dhéanamh ar na pointí seo a leanas:

Cuspóir Druileanna Dóiteáin

An aidhm atá le druileanna dóiteáin ná an méid seo a leanas a chinntiú i gcás dóiteáin trí oiliúint agus cleachtadh:

• Gníomhaíonn na daoine a d’fhéadfadh a bheith i mbaol ar bhealach socair ordúil.
• Tugann siad siúd a bhfuil freagrachtaí sainithe orthu faoina dtascanna chun sábháilteacht gach duine lena mbaineann a chinntiú.
• Úsáidtear na bealaí éalaithe i gcomhréir le plean réamhshocraithe agus cleachta.
• Baintear aslonnú an fhoirgnimh amach ar bhealach éifeachtach agus ordúil.
• Go bhfreagróidh daoine go stuama nuair a bhíonn orthu déileáil le tine nó éigeandáil eile ar scoil nó in áiteanna eile.

Gnáthamh Druile Dóiteáin a Phleanáil

Ba chóir machnamh grinn a dhéanamh agus gnáthamh druile dóiteáin do scoile á chruthú. Agus druil á pleanáil agat, ba cheart duit a bheith ar an eolas faoi na critéir seo a leanas:

• Ba cheart, sa druil dóiteáin, go ndéanfaí aithris ar chás nach mbíonn bealach éalaithe amháin ar fáil.
• Ba cheart gach druil dóiteáin a thosú trí chomhartha réamhshocraithe a úsáid.
• Ba cheart an t-áitreabh scoile iomlán a sheiceáil faoi mar a bheadh fíor-aslonnú ar siúl.
• Caithfear duine sinsearach amháin a ainmniú mar an duine atá i gceannas ar an druil dóiteáin.

Ó thaobh druileanna dóiteáin le haghaidh scoileanna, caithfear machnamh a dhéanamh ar aois na ndaltaí a fhreastalaíonn ar an scoil agus ar cé acu an bhfuil nó nach bhfuil aon leanaí ann a bhfuil riachtanais speisialta acu a bhféadfadh cúnamh a bheith ag teastáil uathu le linn druil nó cás dóiteáin.

Ba cheart go mbunófaí gnáthaimh druile dóiteáin ar shraith ríthábhachtach imeachtaí lena n-áirítear na sé chéim seo a leanas:

1. Oibriú an aláraim

Caithfidh duine ar bith a aimsíonn lasadh dóiteáin an t-aláram dóiteáin is gaire a chur i ngníomh gan mhoill ar bith.

2. Fios a Chur ar an mBriogáid Dóiteáin

Ba cheart an bhriogáid dóiteáin a chur ar an eolas láithreach bonn faoi gach dóiteán a lastar nó aon dóiteán amhrasta, is cuma cé chomh beag, ar an mbealach is tapúla atá ar fáil.

D’fhéadfaí an tasc sin a thabhairt do rúnaí na scoile mar go mbeidh fáil éasca ar ghuthán acu i gcónaí. Má tá duine eile ainmnithe agat chun an fhreagracht sin a chur i gcrích, déan cinnte go mbeidh teacht láithreach ar ghuthán acu ag gach tráth.

3. Aslonnú

Nuair a chloistear an t-aláram dóiteáin, caithfear a rá leis na daltaí an foirgneamh a fhágáil duine i ndiaidh duine agus ar bhealach socair, ordúil.

Caithfidh an duine atá i gceannas ar gach rang an bealach éalaithe a thabhairt le fios a úsáidfear, agus caithfear gach duine a dhíriú chuig pointe tionóil réamhshocraithe.

Seo roinnt rudaí le coinneáil i gcuimhne:

• Caithfear socruithe ar leith a dhéanamh do dhaltaí atá faoi mhíchumas fisiciúil nó meabhrach lena chinntiú go gcabhrófar leo i rith aslonnú.
• Níor cheart aon rith a cheadú chun scaoll a sheachaint.
• Caithfidh gach duine dul síos staighrí duine i ndiaidh duine, agus ní féidir ceadú d’aon duine dul chun tosaigh ar a chéile.
• Ní cead ardaitheoirí a úsáid.
• Caithfidh aon duine nach bhfuil sa rang nuair a bhuailtear an t-aláram dóiteáin dul láithreach bonn chuig an bpointe tionóil.

4. Teacht Le Chéile ag an bPointe Tionóil

Caithfear limistéar lasmuigh d’áitreabh na scoile a ainmniú mar phointe tionóil. Nuair a bheidh do dhaltaí agus do bhaill foirne bailithe ann, ná ceadaigh d’aon duine an foirgneamh a athiontráil go dtí go n-inseoidh Briogáid Dóiteáin Bhaile Átha Cliath nó, i gcás druil dóiteáin, an duine i gceannas, dóibh amhlaidh a dhéanamh.

Seo roinnt leideanna maidir le pointí tionóil dóiteáin do scoile a roghnú:

• Caithfidh an pointe tionóil a bheith fada go leor amach ó áitreabh na scoile le cosaint a thabhairt ó theas agus deatach dóiteáin nó ó éigeandáil eile.
• Caithfidh an pointe tionóil a bheith in áit nach gcuirfidh baol roimh na daltaí agus na baill foirne ó na feithiclí éigeandála atá ag freagairt don teagmhas.
• Ní mór an pointe tionóil a bheith marcáilte go soiléir agus inaitheanta go héasca.

5. An Rolla a Ghlaoch

Ba cheart na cláir thinrimh agus leabhair cuairteoirí a choimeád ag pointe lárnach, agus caithfear iad a thabhairt chuig an bpointe tionóil nuair a bhuailtear an t-aláram. Ba chóir go mbeadh freagracht fhoriomlán ar dhuine amháin as a chinntiú go ndéantar glaoch rolla i gcás druil dóiteáin nó aslonnú.

Nuair atá na ranganna tagtha le chéile ag an bpointe tionóil, caithfear an rolla a ghlaoch nó daoine a chomhaireamh láithreach lena dheimhniú nach bhfuil duine ar bith fós san áitreabh. Caithfear aon chuairteoirí nó conraitheoirí san áitreabh ag an tráth sin a chur san áireamh. Caithfear an comhaireamh a sheiceáil trí úsáid a bhaint as an gclár tinrimh agus leabhar na gcuairteoirí lena dheimhniú go bhfuil gach duine taobh amuigh den fhoirgneamh.

Caithfidh gach múinteoir tuairisc a thabhairt don duine ainmnithe atá i gceannas ar an nós imeachta aslonnaithe lena dheimhniú go bhfuil gach duine atá faoina gceannas sa chomhaireamh nó chun é/í a chur ar an eolas faoi aon duine atá ar iarraidh.

6. Bualadh leis an tSeirbhís Dóiteáin

Caithfidh an duine i gceannas ar an nglaoch rolla é/í féin a chur in aithne do Bhriogáid Dóiteáin Bhaile Átha Cliath ar theacht dóibh. Agus é sin á dhéanamh, is féidir eolas ríthábhachtach a thabhairt don Oifigeach Dóiteáin ar a mbraithfidh gníomhartha na Briogáide Dóiteáin.

Beidh Briogáid Dóiteáin Bhaile Átha Cliath ag iarraidh a fháil amach an bhfuil tuairisc ar gach duine. Mura bhfuil, beidh orthu a bheith ar an eolas faoi:

• Cé mhéad duine atá ar iarraidh?
• Cá mbíonn siad de ghnáth?
• Cá bhfacthas iad an uair dheireanach?
• Cá bhfuil an dóiteán?
• Cad atá trí thine? (B’fhéidir nach mbeidh sé sin soiléir).
• An bhfuil aon substaintí guaiseacha bainteach sa dóiteán nó stóráilte san fhoirgneamh? D’fhéadfadh ceimiceáin, tuaslagóirí, gás peitriliam leachtach, sorcóirí aicéitiléine a bheith i gceist.

Treoir, Oiliúint agus Taifeadadh

Le linn na chéad seachtaine den téarma, nó a luaithe agus is féidir go praiticiúil, ba cheart príomhbhealaí éalaithe na scoile a thaispeáint do gach iontrálaí nua ar an scoil - lena n-áirítear na daltaí, an fhoireann agus an fhoireann tacaíochta.

Ba cheart treoir a thabhairt dóibh, chomh maith, maidir le gnáthamh aslonnaithe dóiteáin na scoile agus aon oiliúint ábhartha.

• Ba cheart treoir a thabhairt do gach ball foirne, agus oiliúint a chur orthu, atá oiriúnach dá bhfreagrachtaí i gcás aon éigeandála.
• Ba cheart do dhuine inniúil treoir a thabhairt do gach ball foirne gach bliain. Ba cheart cóip phearsanta de threoracha ullmhaithe i scríbhinn a thabhairt dóibh go léir. Ba cheart sonraí faoi conas fios a chur ar an mBriogáid Dóiteáin a bheith sa treoir sin freisin.
• Ba cheart treoir a thabhairt do bhaill foirne nua-cheaptha a luaithe agus is féidir i ndiaidh a gceapachán.

Freagrachtaí a Shannadh

In áitreabh mór, ba cheart go leagfaí freagracht ar dhuine ar leith as oiliúint foirne a eagrú. Ba chóir duine eile a ainmniú chun gníomhartha na foirne a chomhordú i gcás dóiteáin. Ba cheart socruithe a dhéanamh freisin go dtabharfadh ionadaí nó ionadaithe faoi na dualgais thuas nuair nach mbíonn na daoine ainmnithe sin i láthair.

In áitreabh níos lú, ní gá freagracht a leagan ach ar dhuine ar leith amháin as an dá chúram sin, ach ba cheart socruithe a dhéanamh go dtabharfadh ionadaí faoi na dualgais sin nuair nach mbíonn an duine ainmnithe i láthair.

Taifid a Choinneáil

Ba cheart taifead ar an oiliúint agus ar an treoir a tugadh, chomh maith leis na druileanna dóiteáin a cuireadh ar siúl, a iontráil i gclár sábháilteachta ó dhóiteán na scoile. Áireofar an méid seo a leanas leis:

• Dáta na treorach nó na druile dóiteáin.
• Fad.
• Ainm an duine a thug an treoir.
• Ainm(neacha) an duine/na ndaoine ar tugadh an treoir dóibh.
• Cineál na treorach nó na druile dóiteáin.

Conas is Féidir le Briogáid Dóiteáin Bhaile Átha Cliath Cabhrú

Tá sé croílár ár gcuid oibre Baile Átha Cliath a choinneáil slán ó dhóiteáin agus ó éigeandálaí eile. Tá cláir ag Briogáid Dóiteáin Bhaile Átha Cliath a chuireann an pobal páirteach i gcosc dóiteáin.

Má theastaíonn uait go dtabharfadh oifigeach dóiteáin caint do do mhic léinn nó do fhoireann, déan teagmháil linn thíos.