Gléasanna Leictreonacha a Luchtú go Sábháilte

Tá gléasanna i ngach teaghlach anois ina bhfuil ceallraí ian litiam nó ian litiam polaiméireach a dteastaíonn athluchtú rialta uathu. I bhformhór mór na gcásanna, ní bheidh aon fhadhbanna mar thoradh air sin, ach ba cheart duit luchtú go sábháilte mar réamhchúram.

(Baineann an t-alt seo le gléasanna beaga a oibríonn ar chadhnraí. Féach ar ár n-alt maidir le Sábháilteacht ó Dhóiteán do Scútair Leictreacha, Rothair Leictreacha agus Gluaischothromáin le haghaidh leideanna luchtaithe do na gléasanna níos mó sin.)

Do Ghléas, Luchtaire agus Cáblaí a Roghnú

Ná húsáid ach gléasanna a bhfuil fíor-Mharc Sábháilteachta Eorpach CE orthu le cinntiú go gcomhlíonann siad na caighdeáin sábháilteachta a bhfuiltear ag súil leo. Chun é sin a dhéanamh, ceannaigh ó mhiondíoltóirí iontaofa iad. Is féidir leat eolas a fháil freisin maidir le fíormharcanna CE a aithint ar shuíomh gréasáin an Choimisiúin um Iomaíocht agus Cosaint Tomhaltóirí

Nuair a bheidh do ghléas socraithe agat, coinnigh na leideanna luchtaithe seo i gcuimhne:

• Is iad an luchtaire agus an cábla a thagann leis an ngléas na hearraí is fearr le húsáid i gcás aon ghléis.
• Ná húsáid luchtairí ná cáblaí a bhfuil damáiste déanta dóibh nó a bhfuil drochdhath orthu.
• Más gá an luchtaire nó an cábla a athsholáthar, ceannaigh fíor-athsholáthairtí brandáilte ón monaróir nó athsholáthairtí brandáilte atá deimhnithe ag an mbunmhonaróir.
• Is dócha nach gcomhlíonfaidh athsholáthairtí neamhchostasacha na caighdeáin sábháilteachta atá riachtanach.

Luchtú go Sábháilte

Agus tú ag fágáil do ghléas le luchtú, cinntigh go ndéanfaidh tú na nithe seo:

• Ná luchtaigh do ghléas ach chomh fada agus is gá, go dtí go sroichfidh sé 100%. Ná róluchtaigh é.
• Ná luchtaigh do chuid gléasanna thar oíche, agus tú i do chodladh nó nuair a fhágann tú do theach.
• Fág do ghléas le luchtú ar dhromchla cothrom, crua, neamh-inlasta.
• Cruthaítear teas go nádúrtha laistigh den cheallra de bharr luchtú, mar sin ná clúdaigh gléas atá á luchtú le piliúr, cúisín, blaincéad ná aon rud eile. Lig don teas scaipeadh.
• Díphlugáil an luchtaire ón soicéad balla nuair nach bhfuil sé in úsáid.

Tá sé tábhachtach freisin a bheith ag faire amach d’aon chomharthaí lena léirítear go bhfuil ceallra do ghléis damáistithe nó ag teip. Bí ag faire amach do na nithe seo:

• Dídhathú, boladh dóite nó comharthaí leáite ar an ngléas nó ar an luchtaire.
• An ceallra nó an chásáil timpeall ar an gceallra a bheith ag at.
• Sceitheadh ​​ón gceallra.
• Iompar neamhrialta; Má tá do ghléas ag luchtú go róthapa nó ag díluchtú níos tapúla ná mar is gnách, d’fhéadfadh sé sin a bheith ina chomhartha go bhfuil an ceallra ag teip.

Má tharlaíonn aon cheann de na rudaí sin, ba chóir duit stop a chur le húsáid an ghléis láithreach agus é a chur lasmuigh de do theach.

Cláir um Chosc Dóiteáin Bhriogáid Dóiteáin Bhaile Átha Cliath

Tá cosaint Bhaile Átha Cliath ó dhóiteáin agus ó éigeandálaí eile lárnach i ngach rud a dhéanaimid. Reáchtálann Briogáid Dóiteáin Bhaile Átha Cliath roinnt cláir shábháilteachta ó dhóiteán a bhfuil sé mar aidhm acu an pobal a spreagadh chun páirt a ghlacadh i gcosc dóiteáin.

Más mian leat go labhródh oifigeach dóiteáin le do scoil, do ghnó nó do phobal, déan teagmháil thíos.